dagh-dehlvi

Mohabbat Ka Asar Jata Kahan Hai

mohabbat ka asar jaata kahan hai

hamara dard-e-sar jaata kahan hai

dil-e-betab siine se nikal kar

chala hai tu kidhar jaata kahan hai

adam kahte hain us kuche ko ai dil

idhar aa be-khabar jaata kahan hai

kahun kis munh se main tere dahan hai

jo hota to kidhar jaata kahan hai

tire jaate hi mar jaunga zalim

mujhe tu chhod kar jaata kahan hai

hamare haath se daman bacha kar

are bedad-gar jaata kahan hai

tiri chori hi sab meri nazar men

chura kar tu nazar jaata kahan hai

agarche pa-shikasta ham hain ai ‘dagh’

magar qasd-e-safar jaata kahan hai

More Poems

Leave a Comment