tiri tasvir uTha.i hui hai
raushni ḳhvab men aa.i hui hai
main ne is dasht ko chhana hua hai
main ne ye ḳhaak uḌaa.i hui hai
dost hain saare zamane vaale
main ne dushman se bana.i hui hai
tujh se ummid vafaon ki mujhe
aag paani men laga.i hui hai
raaz ki baat bata.un main tumhen
baat ye main ne uḌaa.i hui hai
aaj salis main bana huun apna
kal baḌi ḳhud se laḌa.i hui hai
ishq men naam kamaya hua hai
main ne badnami kama.i hui hai
ye mira apna taḳhayyul hai ‘zubair’
ye ghazal sab ne uTha.i hui hai
Leave a Reply