Hayat Madrasi
hamare sher ka hasil ta.assurat se hai
hamara rabta kaghaz qalam davat se hai
hamari ziist ka yuun hadson se rishta hai
ki jaise zulf ko nisbat siyah raat se hai
faza chaman ki to shabnam se ba-vazu hogi
ḳhuda ka zikr alassub.h paat paat se hai
ḳhulus dekhiye patthar men dast-kari ka
jo puuje jaane ki raghbat ḳhuda ki zaat se hai
‘hayat’ jis ki amanat thi us ko lauTa di
ab apni ziist ki vabastagi mamat se hai
Leave a Reply