Ahmad Ali Barqi Azmi
dekha tha jo bhi khvab men ab kya hai kuchh nahin
is husn aur shabab men ab kya hai kuchh nahin
mere liye to jaise vo kaghaz ka phuul tha
us khushnuma gulab men ab kya hai kuchh nahin
ab hain kitab-e-zist ke auraq muntashir
is ke har ek baab men ab kya hai kuchh nahin
mujh ko dikha raha tha abhi tak vo sabz baagh
hai zindagi azaab men ab kya hai kuchh nahin
khush-fahmi ke shikar the vaade pe jis ke sab
kya kya mila hisab men ab kya hai kuchh nahin
jo kuchh bacha ke rakkha tha ainda ke liye
sab mil gaya vo aab men ab kya hai kuchh nahin
mera saval us ke liye la-javab tha
jo kuchh mila javab men ab kya hai kuchh nahin
kal tak samajh raha tha jise jan-e-arzu
is husn-e-intikhab men ab kya hai kuchh nahin
raushan thi jin se sham-e-shabistan-e-zindagi
yadon ke is sarab men ab kya hai kuchh nahin
jo lutf us ki nuqrai avaz men mila
is chang aur rabab men ab kya hai kuchh nahin
‘barqi’ tha jis ka ru-e-hasin misl-e-mahtab
us rashk-e-mahtab men ab kya hai kuchh nahin
Leave a Reply