Mujhe Dariya Ki Maujon Se Bacha Le Jaega Koi

Khalid Raheem

mujhe dariya ki maujon se bacha le ja.ega koi

main aisi buund huun jis ko chura le ja.ega koi

bujha kar taaq men rakh dega ye dast-e-sahar mujh ko

magar jab shaam aa.egi jala le ja.ega koi

yahi kuchh soch kar apni haveli chhoḌ aaya tha

agar main ruuTh ja.unga mana le ja.ega koi

ra.ison ki ye basti hai khaḌe hain raah men saa.il

kahega haath men sikka dua le ja.ega koi

mujhe achchha nahin lagta kisi se maang kar paḌhna

kitaben main ḳharidunga uTha le ja.ega koi

chura laa.i hai phulon se mujhe bad-e-saba ‘ḳhalid’

main ḳhushbu huun mujhe apna bana le ja.ega koi