Poet
kisi ke shikva-ha-e-jaur se vaqif zaban kyuun ho
gham-e-dil aag to lag hi chuki lekin dhuan kyuun ho
mohabbat men visal-o-hijr ki tam.iz kya ma.ani
bisat-e-ishq par bazicha-e-sud-o-ziyan kyuun ho
jabin saa.il thi nadim hai magar ai sajda-e-aḳhir
miri mahrumiyon se be-ta.alluq astan kyuun ho
ḳhudavanda chaman men to nasheman hi nasheman hain
nazar men barq ki sirf ek shaḳh-e-ashiyan kyuun ho
rivayat-e-kuhan ko azm-e-nau ḳhatir men kya laa.e
zamir-e-karvan paband-e-mir-e-karvan kyuun ho
ye maana ek aansu hai magar ai sa.i-e-zabt-e-gham
sar-e-mizhgan ye ik aansu bhi dil ka tarjuman kyuun ho
zamana jab bhula hi baiTha ‘ejaz’-e-hazin tujh ko
koi ab mehrban kyuun ho koi na-mehrban kyuun ho
Leave a Reply