gareban chaak hain gul bostan men
asar kitna hai bulbul ki fughan men
qafas sayyad ka ḳhali pada hai
na hon bechain kyuun kar ashiyan men
dua-e-vasl ja ab to asar tak
kiye nalon ne rauzan asman men
sune gar tala-e-ḳhufta ka qissa
to niind aa jaae chashm-e-pasban men
zuleḳha ki michi jaati hain ankhen
kahin yusuf na ho is karvan men
tamam asbab-e-duniyavi ke badle
hai ik be-raunaqi apni dukan men
suna hal-e-dil-e-‘majruh’ shab ko
koi hasrat si hasrat thi bayan men