Aaram Phir Kahan Hai Jo Ho Dil Mein Ja-E-Hirs

aram phir kahan hai jo ho dil men ja-e-hirs

asuda zer-e-khak nahin ashna-e-hirs

mumkin nahin hai ye ki bhare kasa-e-tamaa

din men karod ghar jo phira de gada-e-hirs

insan na hon zalil zamane ke haath se

zillat kisi ko koi na deve siva-e-hirs

kar munh ko tuk ba-su-e-qanaat ye harf maan

rahti hai laakh tarah ki aafat qifa-e-hirs

nadan talash-e-turra-e-zar se to baaz aa

juun shama ye na ho ki tira sar katae hirs

apne siva kisi ko na paaya harif haif

ki qata rozgar ne ham par qaba-e-hirs

‘sauda’ basar ho khubi se auqat har tarah

par darmiyan na hove ba-shart-e-ki pa-e-hirs

Leave a Comment