Hidayatullah Khan Shamsi
raas aa.i na mujhe anjuman-ara.i bhi
afat-e-jan bani haa.e shanasa.i bhi
dushmanon ki mire auqat kahan thi itni
sazish-e-qatl men shamil tha mira bhaa.i bhi
aankh andhi thi zamane se yahan logon ki
mar ga.i zer-e-dahan quvvat-e-goya.i bhi
tujh se nisbat ho koi sang-e-malamat ki agar
mujh ko pyari hai tire shahr men rusva.i bhi
kashti-e-zist jahan Duub rahi thi meri
mere apne the vahan log tamasha.i bhi
kar diya mujh ko masa.il ne abhi se buḌha
vaqt ne ruḳh se mire chhin li ra.ana.i bhi
muflisi jin ke muqaddar men likhi hai ‘shamsi’
un ke ghar bajti nahin hai kabhi shahna.i bhi
Leave a Reply