mera to naam ret ke sagar pe naqsh hai
phir kis ka naam hai jo tire dar pe naqsh hai
phenka tha ham pe jo kabhi us ko uTha ke dekh
jo kuchh lahu men tha usi patthar pe naqsh hai
shayad idhar se guzra hai ik baar tu kabhi
teri nazar ka lams jo manzar pe naqsh hai
tera ḳhayal mujh se go mil kar bichhaḌ gaya
us ki mahak ka aks mire ghar pe naqsh hai
mere ḳhaton ko rakh ke sirhane vo so gaya
jaaga to mere jism ka bistar pe naqsh hai
ab is men jo bhi Daliye amrit se kam nahin
jo in labon pe tha vahi saghar pe naqsh hai
jo zaḳhm ik nazar se mila tha vo bhar gaya
dhundla sa daagh ruuh ke paikar pe naqsh hai
ḳhanjar chala tha mujh pe magar mo.ajaza hai ye
qatil ka apna ḳhuun hi ḳhanjar pe naqsh hai
‘azad’ kaun tha jo tahon men utar gaya
kis ki hayat hai jo samundar pe naqsh hai
Leave a Reply