jabin par khaak hai ye kis ke dar ki
balaen le raha huun apne sar ki
ubhar aai hain phir choten jigar ki
salamat barchhiyan tirchhi nazar ki
qayamat ki haqiqat janta huun
ye ik thokar hai mere fitnagar ki
kiya majbur ain-e-vafa ne
na karni thi vafa tum se magar ki
na manoge na manoge hamari
udhar ho jaegi duniya idhar ki
hui an-ban kisi se mujh pe barse
balaen mere sar dushman ke sar ki
na tere husn-e-be-parva ki ghayat
na koi had mire zauq-e-nazar ki