azm faani bhi la-zaval bhi hai
aadmi hai to ye kamal bhi hai
aarzu men halavaten bhi hain
aarzu markaz-e-ḳhayal bhi hai
vardat-e-junun ka zikr na chheḌ
kuchh ḳhushi bhi hai kuchh malal bhi hai
aa.ina hai javab vahshat ka
aa.ina paikar-e-saval bhi hai
hai javan fikr daur-e-hazir ki
shiddat-e-hosh se niDhal bhi hai
ḳhvahish-e-zist aaj duniya men
jurm hai aur be-misal bhi hai
kitne suraj ubhar ke Duub ga.e
ufuq-e-dil ko ye ḳhayal bhi hai
apne maazi ko bhulne vaale
tujh se vabasta mera haal bhi hai
chahta huun jise main us ka ‘nazar’
dusra naam la-zaval bhi hai
Leave a Reply