Rafiq Raaz
chand harfon ne bahut shor macha rakkha hai
ya.ani kaghaz pe koi hashr uTha rakkha hai
mujh ko to apne siva kuchh nazar aata hi nahin
main ne divaron ko a.ina bana rakkha hai
aap ke paanv tale se bhi khisakti hai zamin
aap ne kyuun ye falak sar pe uTha rakkha hai
mus.haf-e-zat ki tafsir hai ye gahri chup
chup hi ma.ani hai miyan harf men kya rakkha hai
mujh pe to bhari nahin koi shab-e-hijr mujhe
zaḳhmon ne sarv charaghacharan bana rakkha hai
mera har kaam qayamat hi uTha deta hai
tu ne har kaam qayamat pe uTha rakkha hai
gulshan-e-dil abhi shadab hai pazhmurda nahin
mausam-e-gham ne use kitna hara rakkha hai
Leave a Reply