kal alam-e-ḳhayal men dekha hava ka raqs
barg-e-chaman ke saaz pe bad-e-saba ka raqs
har samt bazgasht miri gunjti rahi
kohsar dekhte rahe meri sada ka raqs
sun dhaḌkanon ki taal pe hota hai kis tarah
ehsas ke qafas men dil-e-be-nava ka raqs
qarnon pe hai muhit gham-e-zat-o-ka.enat
sadiyon se ho raha hai ye harf-e-vafa ka raqs
dil men dhamal Dalti hain aise ḳhvahishen
jaise dahakti aag men mauj-e-hava ka raqs
shayad kabhi ḳhuda ko pasand aa nahin saka
teri dua ka raqs na meri dua ka raqs
Leave a Reply