us se mil kar bhi ḳhalish dil men raha karti hai
vasl ko hijr se kya chiiz juda karti hai
vo na manega pa har shab koi mauhum si aas
ik diya ban ke dar-e-dil pe jala karti hai
auj-e-ausan pe chaḌh chaḌh ke mohabbat ki sharab
jab utarti hai to kuchh aur nasha karti hai
tujh men kya baat hai ai dil ki vafa-kesh ye aql
meri bandi hai magar kaam tira karti hai
na-gahan panja-e-qatil se main kya chhuT gaya
us ki hasrat mire jiine ki dua karti hai
asmanon men uḌa karte hain phule phule
halke logon ke baḌe kaam hava karti hai
Leave a Reply