Sufi

Kya Khabar Kab Se Pyasa Tha Sahra

kya khabar kab se pyasa tha sahra

saare dariya ko pi gaya sahra

log pagDanDiyon men khoe rahe

mujh ko rasta dikha gaya sahra

dhuup ne kya kiya suluk us se

jaise dharti pe bojh tha sahra

badhti aati thi mauj dariya ki

main ne ghar men bula liya sahra

jaane kis shakhs ka muqaddar hai

dhuup men tapta be-sada sahra

kho ke apna vajud andhere men

raat kitna udaas tha sahra

zehn ko vadiyan uthate phiren

aankh men aa ke bas gaya sahra

mere qadmon ko chumne ke liye

raste raste se ja mila sahra

main samundar ko ghar men le aaya

mere dar par pada raha sahra

mera is men bikharna tha ‘abid’

phir mujhe DhunDhta phira sahra

More Poems

Leave a Comment