KHud Wo Aate Agar Yaqin Hota

ḳhud vo aate agar yaqīñ hotā

dard pursish talab nahīñ hotā

dil to kyā jaan tak fidā karte

tum sā lekin koī hasīñ hotā

sajda karte hazār baar magar

koī dar lā.eq-e-jabīñ hotā

is meñ shāmil jo hotā zikr un kā

ye fasāna bahut hasīñ hotā

tere va.adoñ pe bhī yaqīñ karte

ham ko dil par agar yaqīñ hotā

dil pe jab tak na us ke choT aa.e

aadmī kaam kā nahīñ hotā

baada marġhūb-e-dil hai talḳhī se

zahr hotā jo añgbīñ hotā

hastī-e-be-sabāt kā ‘sāhir’

naqsh koī to dil-nashīñ hotā

Leave a Comment