Hasan Naim
qalb-o-jan men husn ki gahra.iyan rah ja.engi
tu vo suraj hai tiri parchha.iyan rah ja.engi
ahl-e-dil ko yaad sadiyon aa.ega mera junun
shohraten hongi fana rusva.iyan rah ja.engi
guftugu tujh se karengi meri ghazlen sub.h-o-sham
teri ḳhalvat men miri tanha.iyan rah ja.engi
main nikal ja.unga apni justuju men ek din
bazm-e-yaran men ḳhayal-ara.iyan rah ja.engi
duur tak koi na hoga naghma-sanjon men ‘na.im’
bas chaman men yaad ki purva.iyan rah ja.engi
Leave a Reply