kitne anjan jaziron men mujhe le ke chala
dil ki an-dekhe zamanon men mujhe le ke chala
main ne kya rang sajae the tire khvabon men
aur tu kaise sarabon men mujhe le ke chala
be-ridai ke bhi din dekhne vaale the ki jab
hakim-e-vaqt asiron men mujhe le ke chala
use maalum tha nisbat miri sadat se hai
jo baraste hue tiron men mujhe le ke chala
jab bhi khola hai da-e-shahr-e-masarrat to koi
phir se nashad jahanon men mujhe le ke chala
dil ko be-rang si mahfil hi faqat bhati thi
vahi viran se chehron men mujhe le ke chala
ja rahi thi main kidhar ko magar ai umr-e-ravan
vaqt ye kaun se lamhon men mujhe le ke chala
Leave a Reply