kya hai shaqq-ul-qamar nazir to hai
chand ke darmiyan lakir to hai
soch sakti huun sach na kah pa.un
mujh men jur.at na ho zamir to hai
vo kisi ki nazar nahin na sahi
dil men paivast ik tiir to hai
hai vahi ka.enat ki buniyad
go vo ik zarra-e-haqir to hai
raushni mangta hai suraj se
chand ik kasa-e-faqir to hai
‘kaif’ ka jo bhi ho adab men maqam
lahja parvin be-nazir to hai
Leave a Reply