Kya Hai Shaqq-Ul-Qamar Nazir to Hai

kyā hai shaqq-ul-qamar nazīr to hai

chāñd ke darmiyāñ lakīr to hai

soch saktī huuñ sach na kah pā.ūñ

mujh meñ jur.at na ho zamīr to hai

vo kisī kī nazar nahīñ na sahī

dil meñ paivast ik tiir to hai

hai vahī kā.enāt kī buniyād

go vo ik zarra-e-haqīr to hai

raushnī māñgtā hai sūraj se

chāñd ik kāsa-e-faqīr to hai

‘kaif’ kā jo bhī ho adab meñ maqām

lahja parvīn be-nazīr to hai

Leave a Comment