zard balbon ke bazuon men asiir
sakht be-jan lambi kaali sadak
apni be-nur dhundli ankhon se
padh rahi hai navishta-e-taqdir
band kamron ke ghup andheron men
billiyan pi rahi hain duudh ke jaam
hotalon cinema-gharon ke qarib
chamchamati hui nai karen
aur panvadiyon ki dokanen
aur kuchh toliyan faqiron ki
pars valon ke intizar men hain
adh-phate postaron ke pairahan
ahani bildigon ke jismon par
kitne dilkash dikhai dete hain
bas ki behis nashiston par baithi
din ke bazar se kharidi hui
aarzu gham umiid mahrumi
niind ki goliyan gulab ke phuul
kele amrud santare chaval
paint gudiya shamiz chuhe-dan
ek ik shai ka kar rahi hai hisab
ahd-e-hazir ki dil-ruba makhluq!
Leave a Reply