daraKHt Mujhko Nai Kahani Suna Rahe Hain

Ali Qaisar

daraḳht mujh ko na.i kahani suna rahe hain

ki ye parinde ga.e dinon men ḳhuda rahe hain

main kuchh dinon men ḳhuda se milne ko ja raha huun

mujhe lakiron ko paḌhne vaale bata rahe hain

tamam shahron ko dushmanon ne bacha liya hai

mire sipahi bas apni janen bacha rahe hain

sisak rahe hain tamam va.ada nibhane vaale

ki ham ye kaisi aziyyaton ko nibha rahe hain

kisi ne khiḌki ko kholna hai to dekhna hai

so ham gali men gulon ke jhurmuT laga rahe hain

bichhaḌne vaale ne kab palaT kar ye dekhna hai

ki gham badan ke tamam hisson ko kha rahe hain

ye peḌ vaqif hain in fusun-ḳhez ḳhushbuon se

so ehtiraman tamam sar ko jhuka rahe hain