shab karne ko yuun to kya kuchh hai
kab hamara jiya hua kuchh hai
aur to kuchh nahin hamare paas
par tumhara chhua hua kuchh hai
ek hi vaqi.a tha phir bhi shab
tum ko kuchh mujh ko dusra kuchh hai
itna mahir hai duniya-dari men
sochta kuchh hai bolta kuchh hai
apni palkon ko muund le nadan
samne kuchh hai dekhta kuchh hai
andarun roz mujh se kahta hai
jiite jaane se mudda.a kuchh hai ?
maut jab aa.i tab hua malum
bujhti ankhon men ḳhvab sa kuchh hai
us ko jab dekhte hue dekha
tab khula ham pe dekhna kuchh hai
soch lete hain us ko vaqt-ba-vaqt
jiite rahne men fa.eda kuchh hai
tum ne dekha hai haal duniya ka
tum ko lagta hai kya ḳhuda kuchh hai ?
Leave a Reply