Manzar Naqvi
ik ariza hai dil-e-mushtaq men rakkha hua
aftab-e-ishq hai afaq men rakkha hua
zindagi ka za.iqa mujh ko tavatur se mila
zahr men rakha hua tiryaq men rakkha hua
nafraton ke sab navishte us ne azbar kar liye
hai mohabbat ka sahifa taaq men rakha hua
balva-e-batil men haq ki ḳhamushi ka saath do
ye bhi nukta hai mire misaq men rakkha hua
raakh uḌti dekh kar mujh se gurezan kyon hue
ek sho.ala hai abhi chaqmaq men rakkha hua
main ne dekha mera qatil mubtala-e-ḳhauf hai
sar mira tha jis ghaḌi itbaq men rakkha hua
lau na maddham hogi ‘manzar’ bujh na pa.ega kabhi
ye diya hai sina-e-ushshaq men rakkha hua
Leave a Reply