suno to zara ye aḳhir-e-shab nafir-e-dua ajiib si hai
zaman-o-makan pe chha.i hui junun ki nava ajiib si hai
nizam naya shu.ur naya misal-e-ata ajiib si hai
saval pe haath kaTte hain talab ki saza ajiib si hai
jigar pe har ik sinan-e-nazar jo sahte hue guzar ga.e ham
javab men ab harifon ki shikast-e-ana ajiib si hai
ye pas-e-bahar ashk piye jo dard baḌha to sher kahe
bata.en kise hamari tabahiyon ki ada ajiib si hai
utar ga.e chehre gardishon ke laraz ga.i jaan faslon ki
shikasta dilon ke qafile men fughan-e-dara ajiib si hai
zamane ke sard-o-garm se kab mili hai amaan mujhe ‘kausar’
vajud-e-nafas ko baḳhshi hui karam ki qaba ajiib si hai
Leave a Reply