Afzal Naved
makan-e-khvab men jangal ki baas rahne lagi
koi na aaya to zinon pe ghaas rahne lagi
tire vajud ka jab se libas rahne lagi
liye diye hue mujh se kapas rahne lagi
ye aur baat anokhi si pyaas rahne lagi
miri zaban pe us ki mithas rahne lagi
jhalak thi ya koi khushbu-e-khadd-o-khal thi vo
chali gai to mire aas paas rahne lagi
gaya hujum liye baz-did naqsh-e-qadam
hava-e-rahguzar bad-havas rahne lagi
zarae jo the mayassar hue ghubar-e-shanakht
darun se chashm-e-darun na-shanas rahne lagi
abhi ghubar na utra tha saans ka andar
utarne ki pas-e-zindan bhadas rahne lagi
utaar phenk diya jo tha jism-e-bosida
sitaron ki koi utran libas rahne lagi
zyada zor lagane se kuchh na ho sakta
so aae roz ki halchal hi raas rahne lagi
lahad ne daman-e-yakh-basta khol kar rakkha
badan men garmi-e-khauf-o-hiras rahne lagi
na jaane andhe kuon ki vo tishnagi thi kya
har ek aankh men jo be-libas rahne lagi
bigad jis se ho paida koi bigad nahin
so moajize ki mire dil ko aas rahne lagi
mughairat se bhari tirgi ke biich ‘naved’
ik andaruni ramaq ru-shanas rahne lagi
Leave a Reply