Amjad Husain Hafiz Karnataki
ye mahakte hue jazbat ye ash.ar ke phuul
kaash kaam aa.en kisi ke mire afkar ke phuul
mere dil ne jo saja rakkhe hain zaḳhmon ki tarah
khil na paa.e kisi gulshan men vo me.aar ke phuul
sunghti hain unhen ḳhush ho ke bahishti huren
sarfaroshon ke badan par hain jo talvar ke phuul
ye mire ashk-e-nadamat hain ḳhuda ko mahbub
duniya valon ki nigahon men hain be-kar ke phuul
mujh ko tohfe men ata us ne kiye hain ‘hafiz’
kabhi inkar ke kanTe kabhi iqrar ke phuul
Leave a Reply