ik ah-e-zer-e-lab ke gunahgar ho ga.e
ab ham bhi daḳhil-e-saf-e-aghyar ho ga.e
jis dard ko samajhte the ham un ka faiz-e-ḳhas
us dard ke bhi laakh ḳharidar ho ga.e
jin hauslon se mera junun mutma.in na tha
vo hausle zamane ke me.aar ho ga.e
har va.ada jaise harf-e-ghalat tha sarab tha
ham to nisar-e-jur.at-e-inkar ho ga.e
sarsabz pattiyon ka lahu chuus chuus kar
kitne hi phuul raunaq-e-gulzar ho ga.e
‘zaidi’ ne taaza sher suna.e ba-rang-e-ḳhas
ham bhi ḳhuda-e-shoḳhi-e-afkar ho ga.e
Leave a Reply