samundar ki tah men
samundar ki sangin tah men
hai sanduq
sanduq men ek dibiya men dibiya
men dibiya
men kitne maani ki subhen
vo subhen ki jin par risalat ke dar-band
apni shuaon men jakdi hui
kitni sahmi huii!
(ye sanduq kyuun kar gira?
na jaane kisi ne churaya?
hamare hi hathon se phisla?
phisal kar gira?
samundar ki tah men magar kab?
hamesha se pahle
hamesha se bhi sal-ha-sal pahle?
aur ab tak hai sanduq ke gird
lafzon ki raton ka pahra
vo lafzon ki raten
jo devon ki manind
paani ke las-dar devon ke manind
ye lafzon ki raten
samundar ki tah men to basti nahin hain
magar apne la-raib pahre ki khatir
vahin rengti hain
shab o roz
sanduq ke chaar su rengti hain
samundar ki tah men!
bahut sochta huun
kabhi ye maani ki pakiza subhon ki pariyan
rihai ki ummid men
apne ghavvas jadu-garon ki
sadaen sunengi?