Sar-E-KHayal Hai Ye Kaun Agar Nahin Hun Main

Kuldeep Kumar

sar-e-ḳhayal hai ye kaun agar nahin huun main

jidhar talash rahe ho udhar nahin huun main

ye taur-e-justuju thoḌa badal ke dekho na

main aur kuchh bhi huun ik jism bhar nahin huun main

ye kis ki shakl meri zaat par numayan hai

miri tarah to lage hai magar nahin huun main

thakan safar ki sameTe hue huun paanv men

ye aur baat ki zer-e-safar nahin huun main

guzarte dam zara sha.istagi barat mujh se

main ek zat-e-bashar huun ki dar nahin huun main

main sochta huun ki ab ishq hi karun tujh se

bahut dinon se kisi kaam par nahin huun main

shab-e-javani huun aisa na ho guzar ja.un

so mujh ko ji lo ki phir umr bhar nahin huun main