Mustafa Rahi
jo falsafa-o-danish-o-hikmat ne tarashe
vo nit-na.e asnam bhi ham toḌ ke ḳhush hain
farsuda rivayat ke paband rahen kyuun
har rahguzar-e-am ko ham chhoḌ ke ḳhush hain
zindan-e-anasir hi pe mauquf nahin kuchh
zanjir-e-shab-o-roz bhi ham toḌ ke ḳhush hain
afsana-e-dil hai bhi nahin bhi hai mukammal
ik aise hasin moḌ pe ham chhoḌ ke ḳhush hain
mast-e-mai-e-pindar hain jo aur hain vo log
ham log to TuuTe hue dil joḌ ke ḳhush hain
afsurda-o-pazhmurda-o-nakam rahen kyuun
ham gardish-e-ayyam ka ruḳh moḌ ke ḳhush hain
Leave a Reply