ik ḳhvab tha ankhon men jo ab ashk-e-sahar hai
ik ta.ir-e-vahshi tha so vo ḳhuun men tar hai
vo duur nahin hai ye rasa.i nahin hoti
har lamha koi taaza ḳham-e-rahguzar hai
dil aaj kuchh is tarah dhaḌakta hai ki jaise
ab shauq-e-mulaqat pe haavi koi Dar hai
kuchh hausla-e-zabt hai kuchh vaz.a hai apni
sho.ala na bana lab pe jo siine men sharar hai
sunte to rahe sab ki ye hasrat rahi dil men
ham par bhi khule ziist ka mafhum agar hai
taraj baharan hai ki ik jashn-e-junun hai
raqsan hain bagule ki hava ḳhak-basar hai
ashufta kiya itna ‘ziya’ dar-ba-dari ne
bavar nahin aata ki hamara koi ghar hai
Leave a Reply