lab pe pabandi to hai ehsas par pahra to hai
phir bhi ahl-e-dil ko ahval-e-bashar kahna to hai
khun-e-aada se na ho khun-e-shahidan hi se ho
kuchh na kuchh is daur men rang-e-chaman nikhra to hai
apni ghairat bech Dalen apna maslak chhod den
rahnumaon men bhi kuchh logon ka ye mansha to hai
hai jinhen sab se ziyada daava-e-hubbul-vatan
aaj un ki vajh se hubb-e-vatan rusva to hai
bujh rahe hain ek ik kar ke aqidon ke diye
is andhere ka bhi lekin samna karna to hai
jhuut kyuun bolen farogh-e-maslahat ke naam par
zindagi pyari sahi lekin hamen marna to hai