saare ma.amulat men ik taaza gardish chahiye
nam zamin par ḳhushk mausam ki navazish chahiye
shahr ke aa.iin men ye mad bhi likkhi ja.egi
zinda rahna ho to qatil ki sifarish chahiye
meri mushkil bhagte lamhon ko pakḌun kis tarah
zid use an-dekhe ḳhvabon ki numa.ish chahiye
bhejta main kis ko sub.hon ki kunvari raushni
us ko buḌhi raat ke rangon ki tabish chahiye
sukhte alfaz ke mausam men harf-e-tar huun main
phir saza pahle sama.at ki navazish chahiye
jo hamara tha vo nikla aftabon ka halif
kis ḳhuda se ab kaha jaa.e ki barish chahiye
baryabi shart-e-ḳhamoshi pe hai vo is tarah
pahle hi tafsil-e-ahval-e-guzarish chahiye
buz-dili meri thi jo ‘manzur’ main zaḳhmi hua
vo sipar-bardar the un ki sata.ish chahiye
Leave a Reply