dilon men farq hai to guftugu se kuchh nahin hoga
chal uTh tishna-labi jam-o-subu se kuchh nahin hoga
na puuri ho saki jo aarzu ab tak vo kahti hai
jo puuri ho ga.i us aarzu se kuchh nahin hoga
miyan jab itne saare doston se kuchh nahin bigḌa
hamen ma.alum hai ab ik adu se kuchh nahin hoga
gareban ḳharjiyyat aur vahshat daḳhliyyat hai
lihaza ḳharjiyyat ke rafu se kuchh nahin hoga
tafannun ke liye nam-o-numu ki dauḌ men hain ham
hamen ma.alum hai nam-o-numu se kuchh nahin hoga
‘shuja.a’ tere hi tahat-al-lafz se kuchh ho to ho varna
ghazal men sha.eran-e-ḳhush-gulu se kuchh nahin hoga
Leave a Reply