Ahmad Faraz
main ki do roz ka mehman tire shahr men tha
ab chala huun to koi faisla kar bhi na saka
zindagi ki ye ghadi tutta pul ho jaise
ki thahar bhi na sakun aur guzar bhi na sakun
mehrban hain tiri ankhen magar ai munis-e-jan
in se har zakhm-e-tamanna to nahin bhar sakta
aisi be-nam masafat ho to manzil kaisi
koi basti ho basera hi nahin kar sakta
ek muddat hui laila-e-vatan se bichhde
ab bhi riste hain magar zakhm purane mere
jab se sarsar mire gulshan men chali hai tab se
barg-e-avara ki manind thikane mere
aaj is shahr kal us shahr ka rasta lena
haae kya chiiz gharib-ul-vatani hoti hai
ye safar itna musalsal hai ki thak haar ke bhi
baith jaata huun jahan chhanv ghani hoti hai
tu bhi aisa hi dil-aram shajar hai jis ne
mujh ko is dasht-e-qayamat se bachae rakha
ek ashufta-sar o abla-pa ki khatir
kabhi zulfon kabhi palkon ko bichhae rakha
dukh to har vaqt taaqub men raha karte hain
yuun panahon men kahan tak koi rah sakta hai
kab talak ret ki divar sambhale koi
vo thakan hai ki mera jism bhi dah sakta hai
ajnabi log nae log parai galiyan
zindagi aaise qarain men kategi kaise
teri chahat bhi muqaddas teri qurbat bhi bahisht
des paradesh ki tafriq ghategi kaise
na-guzir aaj hua jaise bichhadna apna
kal kisi roz mulaqat bhi imkan men hai
main ye pairahan-e-jan kaise badal sakta huun
ki tira haath mere dil ke gareban men hai
Leave a Reply