arbab-e-gulistan ka chalan dekh raha huun
kaliyon ki jabinon pe shikan dekh raha huun
nazron men simaTti chali aati hain baharen
ik shoḳh ki ra.ana.i-e-tan dekh raha huun
har phuul tire husn ka a.ina bana hai
jalve tire ai jan-e-chaman dekh raha huun
halat ki gardish bhi nazar men hai magar aah!
majbur nigahon men thakan dekh raha huun
phir shauq-e-shahadat men baḌhe aate hain jan-baz
ik hashr sar-e-dar-o-rasan dekh raha huun
ye vadi-e-gul-posh hasinon ke ye jhurmuT
har samt sitaron ke chaman dekh raha huun
ai ‘naqsh’ nazar men hain na.e daur ke andaz
miTte hue asar-e-kuhan dekh raha huun
Leave a Reply