Shishon Ki Baat Aur Hai Saghar Ki Baat Aur

Poet

shishon ki baat aur hai saghar ki baat aur

saaqi hai teri chashm-e-fusun-gar ki baat aur

fanus ne farogh diya sham-e-husn ko

parde se baḌh ga.i ruḳh-e-anvar ki baat aur

ishrat-sara-e-ḳhuld ka munkir to main nahin

lekin tumhare dam se hai is ghar ki baat aur

dil nazuki men fard ḳhirad saḳhtiyon men taaq

shishe ki baat aur hai patthar ki baat aur

vo bar-sabil-e-davat-e-tauba sahi magar

kuchh der naseha mai-o-saghar ki baat aur

donon hain ek phir bhi jarahat men farq hai

abru ki baat aur hai ḳhanjar ki baat aur

bahr-e-sujud yuun to hazaron hain astan

un sab ki baat aur hai us dar ki baat aur

asar kah rahe hain ki manzil qarib hai

vaise to ham-safar hai muqaddar ki baat aur

donon ki shakl ek hai qimat juda juda

aansu ki baat aur hai gauhar ki baat aur

‘faruq’ un ke va.ada-e-farda pe ḳhush na ho

andar ki baat aur hai uupar ki baat aur