zehn o dil ke fasle the ham jinhen sahte rahe
ek hi ghar men bahut se ajnabi rahte rahe
duur tak sahil pe dil ke ablon ka aks tha
kashtiyan sholon ki dariya mom ke bahte rahe
kaise pahunche manzilon tak vahshaton ke qafile
ham sarabon se safar ki dastan kahte rahe
aane vaale mausamon ko tazgi milti gai
apni fasl-e-arzu ko ham khizan kahte rahe
kaise mit paengi ‘zarrin’ ye haden afkar ki
tuut kar dil ke kinare duur tak bahte rahe
Leave a Reply