Syed Shakeel Desnavi
baiThe rahenge thaam ke kab tak yuun ḳhali paimane log
had se baḌhe jab tishna-labi to phunk na den maiḳhane log
ham duniya ko de kar ḳhushiyan gham badle men lete hain
DhunDe se bhi ab na milenge ham jaise divane log
kya janen yuun dil ke kitne zaḳhm hare ho jaate hain
chheḌ ke baat ik harja.i ki aate hain samjhane log
ik sha.ir divana sa kyuun nagri nagri phirta hai
aa.e ya na samajh men aa.e gaḌhte hain afsane log
dil par kitne zaḳhm lage hain tab ja kar ye jaana hai
apnon se to achchhe hain har surat ye begane log
Leave a Reply