Ahmad Shanas
tasavvur ko jaga rakkha hai us ne
daricha niim va rakkha hai us ne
zara sa phuul mere baagh men hai
bahut kuchh mavara rakkha hai us ne
bina dekhe gavahi mangta hai
saval apna juda rakkha hai us ne
mire hone se khud mera taalluq
ba-rang-e-intiha rakkha hai us ne
mita deta hai har tasvir meri
mujhe apna bana rakkha hai us ne
hamari pyaas qatron men likhi hai
magar dariya baha rakkha hai us ne
ye suraj chand taron ka zamana
bas ik lamha jala rakkha hai us ne
banavat barmala phulon ki surat
ki khushbu ko chhupa rakkha hai us ne
khadi hai raah roke khud-farebi
mujhe vapas bula rakkha hai us ne
hava ka hai na paani ka karishma
nafas ko khud jala rakkha hai us ne
mujhe be-nam kar deta hai ‘ahmad’
ki naam apna khuda rakkha hai us ne
Leave a Reply