Bebasi Se Hath Apne Malne Wale Hum Nahin

Shmashad Shad

bebasi se haath apne malne vaale ham nahin

mehrbani par kisi ki palne vaale ham nahin

rahguzar apni juda hai falsafa apna alag

ja tire naqsh-e-qadam par chalne vaale ham nahin

ek bas dil ka kiya hai jan-e-jan tujh se saval

dil liye bin tere dar se Talne vaale ham nahin

ham ki suraj ki tarah buzdil nahin ai zulmato

tirgi-e-shab se Dar kar Dhalne vaale ham nahin

makr ka unsur hamari ḳhu men paoge na tum

miThi baton se kisi ko chhalne vaale ham nahin

teri marzi se hi phalti phulti hai zindagi

tu na chahe to ḳhudaya phalne vaale ham nahin

ham ki apni zaat men be-fikr-o-be-parva hain ‘shad’

sozish-e-ranj-o-alam men jalne vaale ham nahin