Sochi Thi Jo Wo Jurm-O-Saza Tak Pahunch Gai

sochī thī jo vo jurm-o-sazā tak pahuñch ga.ī

jo baat dil meñ thī vo ḳhudā tak pahuñch ga.ī

patta girā ki sar pe koī sañg aa lagā

chup-chāp us kī yaad sadā tak pahuñch ga.ī

us gul pe phuul phuul ne dil meñ kiyā hai rashk

jab shab kī baat bād-e-sabā tak pahuñch ga.ī

maiñ mahv-e-ḳhvāb thā ki mire man kī ek mauj

uTThī to us ke band-e-qabā tak pahuñch ga.ī

maiñ baat kar rahā thā zamāne ke jaur kī

aage baḌhī to us kī adā tak pahuñch ga.ī

ik aarzū ki dil meñ rahī hai tamām-umr

tañg aa ke aaj dast-e-duā tak pahuñch ga.ī

Leave a Comment