sochi thi jo vo jurm-o-saza tak pahunch ga.i
jo baat dil men thi vo ḳhuda tak pahunch ga.i
patta gira ki sar pe koi sang aa laga
chup-chap us ki yaad sada tak pahunch ga.i
us gul pe phuul phuul ne dil men kiya hai rashk
jab shab ki baat bad-e-saba tak pahunch ga.i
main mahv-e-ḳhvab tha ki mire man ki ek mauj
uTThi to us ke band-e-qaba tak pahunch ga.i
main baat kar raha tha zamane ke jaur ki
aage baḌhi to us ki ada tak pahunch ga.i
ik aarzu ki dil men rahi hai tamam-umr
tang aa ke aaj dast-e-dua tak pahunch ga.i
Leave a Reply