umr bhar Thokaren kha-kha ke sanbhalte rahna
hausla jiine ka rakhte ho to chalte rahna
vasl ki raat ho har roz badan ki ḳhvahish
ḳhaslat-e-ishq hai ta-umr machalte rahna
sochta huun to bahut der talak hansta huun
mera din bhar tiri galiyon men Tahalte rahna
ye dua de ke kaha us ne ke masha-allah
jaan se jaane talak ḳhuun ugalte rahna
roz dar roz yahan aabru luT jaati hai
itna asan kahan ghar se nikalte rahna
is na.e daur men chhu lete bulandi lekin
ham ne sikha hi nahin rang badalte rahna
ab to shayad hai yahi apna muqaddar ‘rizvan’
sochna tujh ko tire hijr men jalte rahna
Leave a Reply