hunar jo talib-e-zar ho hunar nahin rahta
mahal-sara men koi kuza-gar nahin rahta
bichhaḌte vaqt kisi se hamen bhi tha ye guman
ki zaḳhm kaisa bhi ho umr-bhar nahin rahta
main apne haq ke siva mangta agar kuchh aur
to mere harf-e-dua men asar nahin rahta
kuchh aur bhi guzar-auqat ke vasile hain
gada ḳhazina-e-kashkol par nahin rahta
vo kaun hai jo musafir ke saath chalta hai
ḳhayal-e-yar bhi jab ham-safar nahin rahta
jise banate sajate hain jis men rahte hain
savere aankh khule to vo ghar nahin rahta
khuli faza na rahe yaad agar parindon ko
gham-e-shikastagi-e-bal-o-par nahin rahta
ham ek shab men ka.i ḳhvab dekhte hain so ab
vo aa ke ḳhvab men bhi rat-bhar nahin rahta
‘kamal’ log bhi kya hain guman ye rakhte hain
jo bas gaya ho kahin dar-ba-dar nahin rahta
Leave a Reply