main vo nahin raha vo mira dil nahin raha
ab main kisi se ishq ke qabil nahin raha
kal mere ghar se mera musalla uḌa liya
mulla bhi e’tibar ke qabil nahin raha
english agar na aa saki hindi to siikh li
us shoḳh ki nigah men jahil nahin raha
kavve malhar gaa.en ki ullu bhajan suna.en
jab gulistan men shor-e-anadil nahin raha
jaata zarur haj ko magar aah kya karun
bar-e-gunah se chalne ke qabil nahin raha
sunte hain seTh ji ka divala nikal gaya
jis mil pe un ko naaz tha vo mil nahin raha
daḌhi baḌha.i ban gaya sha.ir se maulvi
‘hashim’ ab un se ishq ke qabil nahin raha
Leave a Reply