abdussamad-tapish

Khauf-O-Wahshat Bar-Sar-e-Bazar Rakh Jata Hai Kaun

khauf-o-vahshat bar-sar-e-bazar rakh jaata hai kaun

yuun rag-e-ehsas par talvar rakh jaata hai kaun

kyuun vo milne se gurezan is qadar hone lage

mere un ke darmiyan divar rakh jaata hai kaun

mimbar-o-mehrab se atish-fishan hote to hain

vaqt ki dahliz par dastar rakh jaata hai kaun

bas khuda ghafil nahin hai varna is manjdhar men

meri kashti ke liye patvar rakh jaata hai kaun

ye mira zauq-e-safar hai varna aisi dhuup men

har qadam par ik shajar chhitnar rakh jaata hai kaun

dil badi nazuk si shai hai un se itna puchhiye

tuute shishon ka yahan ambar rakh jaata hai kaun

tirgi apna muqaddar likh chuki phir bhi ‘tapish’

aaine men ik ghalat pindar rakh jaata hai kaun

More Poems

Leave a Comment