Salim Saleem
kuchh to Thahre hue dariya men ravani karen ham
aao duniya ki haqiqat ko kahani karen ham
apne maujud men milte hi nahin hain ham log
jo hai ma.adum use apni nishani karen ham
pahle ik yaar bana.en koi us ke jaisa
aur phir ijad koi dushman-e-jani karen ham
jab naya kaam hi karne ko nahin hai koi
baiThe baiThe yuun hi ik chiiz purani karen ham
hijr ke din to hue ḳhatm baḌi dhuum ke saath
vasl ki raat hai kyuun marsiya-ḳhvani karen ham
Leave a Reply