Poet
ifsha hue asrar-e-junun jama-dari se
chhape gae akhbar miri be-khabari se
dam naak men aaya hai ab is nauhagari se
dil pak gaya ai aah tiri be-asari se
kya din hain jo gul khilte hain shoale hain dahakte
lu chalti hai baghon men nasim-e-sahari se
sone ke nivalon se na kar parvarish-e-ruh
itni bhi mohabbat nahin karte safari se
kab ahl-e-duval se hui maabud-parasti
batil hai agar sajda karen taj-e-zari se
har haal men rahti hai khuda par nazar apni
ye martaba hasil hai hamen be-hunari se
maghrur na ho chand se rukhsar par apne
ye qumquma raushan hai charagh-e-sahari se
tu vo hai shah-e-husn agar baaj talab ho
le huur se guldasta tabaq shah-e-pari se
munh chadhte hain bad-asl tamiz un ko nahin hai
danton se ladi silk-e-guhar bad-guhari se
ankhon se nikalvaiye ankhen hirnon ki
chiton ki kamar todiye nazuk-kamari se
naubat to kahin qatl-e-gunahgar ki aai
naqqare bajaunga men tiron ki sari se
pusht-e-lab-e-shaffaf se joban hai mison ka
sabze ne numu ki hai aqiq-e-shajari se
piiri men bhi ham se na hui khana-nashini
baaz aae na bazmon se na guzre guzri se
qad tiir sa talvar tavazoa se hua hai
vo haath uthate nahin be-dad-gari se
jab chaho chale aao ye vaada nahin achchha
dil aankh churata hai bahut muntazari se
ab zof-e-junun kucha-e-janan men baha de
kab tak ye varam paanv par ashufta-sari se
vo chot kaleje men lagi hai ki na puchho
tadpunga tah-e-khak bhi dard-e-jigari se
rone ka na le naam gham-e-yar men ai ‘bahr’
ulte na zamane ka varaq lab ki tari se
Leave a Reply