soch raha hai itna kyuun ai dast-e-be-taḳhir nikal
tu ne apne tarkash men jo rakkha hai vo tiir nikal
jis ka kuchh anjam nahin vo jang hai do naqqadon ki
lafzon ki saffak sinanen lahjon ki shamshir nikal
ashob-e-taḳhrib sa kuchh is andam-e-taḳhliq men hai
toḌ mire divar-o-dar ko ek na.i ta.amir nikal
chand sitaron ki kheti kar raat ki banjar dharti par
aankh ke is sukhe dariya se ḳhvabon ki ta.abir nikal
tere is ehsan se meri ghairat ka dam ghuTta hai
mere in pairon se apni shohrat ki zanjir nikal
roz ki apa-dhapi se kuchh vaqt chura kar laa.e hain
yaar zara ham donon ki ik achchhi si tasvir nikal
‘shahid’ ab ye aalam hai is ahd-e-suḳhan-arzani ka
‘mir’ pe kar irad bhi us pe ‘ghalib’ ki tafsir nikal
Leave a Reply